Kryetari i Komisionit Qëndror të Zgjedhjeve, Ilirjan Celibashi, ka folur në emisionin “Kjo Javë” për zgjedhjet e pjesshme vendore që do të zhvillohen nesër në 6 bashki.
AI u shpreh se ka filluar shpërndarja e bazës material, por ka patur disa problematika në Shkodër dhe Vorë, ndërsa shtoi se KQZ është duke punuar për ta përshpejtuar procesin e dorëzimit të bazës materiale me qëllim që nesër në orën 07:00 të mos ketë asnjë problem.
Sipas tij, rezultati i zgjedhjeve do të publikohet më herët sesa ora 22:00 e ditës së martë, të cilën e parashikon Kodi Zgjedhor.
Pjesë nga intervista:
Celibashi: E them me siguri që nuk do të ketë asnjë problem lidhur me procesin e votimit në Vorë. Në Vorë do të votohet nëpërmjet sistemit elektronik të votimin , që administrohet nga persona të autorizuar
Votimi elektronik në Vorë , sa i sigurt është?
Celibashi: Është 100% i sigurt, është garancia e plotë e ruajtjes së garancisë së votës dhe e them me siguri të plotë. ne do të shpallim rezultatin sapo të mbyllet votimi, jo më shumë se një orë, duke pritur edhe përfundimin në qendrat e votimit. Në lidhje me emërimin e anëtarëve të grupit të numërimit nuk kemi asnjë problem. Ngelet për tu parë se si do të jetë ecuria gjatë ditës së nesërme. Të gjitha qendrat e votimit janë të mbuluara me operatorë që do të operojnë me pajisjen e identifikimit elektronik dhe deri tani nuk kemi problematika. Procesi i trajnimit për këto operatorë është trajtuar me korrektësi.
Kur mund të kemi një rezultat përfundimtar për 6 bashkitë?
Celibashi: Kodi Zgjedhor përcakton orën 22:00 të ditës së martë, por besoj se do ta kemi më shpejt rezultatin. Kemi marrë të gjitha masat. Gjithashtu besoj që partitë politike do të reflektojnë për të gjitha përgjegjësitë që ato kanë. Në faqen e internetit të KQZ do të gjendet çdo informacion i përditësuar çdo 1 orë në lidhje me pjesëmarrjen në votim.
