Ministrja Belinda Balluku ka vlerësuar afrimet që ka bërë kryeministri Edi Rama në PS, për zgjedhjet e 25 prillit, Luljeta Bozon dhe Najada Çomon.
“Marr shtysë nga të gjitha përzgjedhjet që janë bërë ditët e fundit, të shikosh Luljeta Bozon apo doktoreshë Najadën mbushesh me krenari sepse mendon që pragun e parlamentit do ta kalojnë njerëz që kanë vlera dhe kanë kontribuar në këto dy vite të vështira, dhe kanë qenë heronjtë e Shqipërisë”, u shpreh Balluku në Klan Neës.
Vetë ministrja ka thënë se nëse kreu i Institutit të Ndërtimit Agron Hysenlliu do të ishte gjallë, ajo do t’i kërkonte që ta zëvendësonte me të. “Nëse Agron Hysenlliu do ishte gjallë, unë do kisha bërë një veprim publik dhe do i kërkoja kryetarit që të zëvendësohesha nga Agroni”, tha ajo.
Kujtojmë se, Drejtori i Institutit të Ndërtimit, Agron Hysenlliu u nda nga jeta më 15 nëntor 2020 pasi nuk e fitoi dot betejën me Covid-19. Ai qëndroi i shtruar në Spitalin Infektiv për 10 ditë, i intubuar, por fatkeqësisht nuk ia doli dot.
