Kryepeshkopi Janullatos mori nënshtetësinë shqiptare nga Presidenti Meta, por lobimi për marrjen e saj nuk ka munguar vazhdimisht nga nivelet më të larta të politikës greke.
Burime nga ish-stafi i presidentit Moisiu thanë për “Panorama” se si presidenti grek Kostis Stefanopoulos, ashtu dhe presidenti Karolos Papoulias, kanë ndërhyrë pranë Moisiut që ai t’i dekretojë nënshtetësinë shqiptare kryepeshkopit Janullatos.
Gjatë vizitës së tij në Shqipëri, më 20 Tetor 2004, presidenti Stefanopoulos i ka kërkuar presidentit të Shqipërisë që ta shikonte kërkesën e hershme të Janullatosit për nënshtetësi shqiptare, kërkesë që ishte refuzuar deri në atë kohë nga presidentët paraardhës të tij.
Presidenti Moisiu e ka justifikuar mosdhënien e nënshtetësisë shqiptare me faktin se edhe përfaqësues të besimeve të tjera, katolike, nga Italia apo Kroacia, por dhe të besimit mysliman, që kanë ardhur nga vendet myslimane kishin bërë të njëjtën kërkesë.
Sipas Moisiut, nëse nënshtetësia do t’i jepej kryepeshkopit Janullatos, atëherë kjo do krijonte precedent dhe për kërkesat e tjera.
Këtë justifikim Moisiu ia ka bërë dhe pasardhësit të Stefanopouls në krye të shtetit grek, Karolos Papoulias.
