Ishte në kërkim ndërkombëtar për rreth 40 vjedhje në Spanjë, por në Kurbin ushtronte postin e drejtorit të Ujësjellës-Kanalizime. Alfred Prodani, i arrestuar të shtunën për llogari të autoriteteve spanjolle, pritet të dalë këtë të hënë përpara gjykatës për t’u njohur me masën e sigurisë.
Prodani po mbahen në dhomat e paraburgimit të Komisariatit të Policisë Kurbin, në pritje për të dalë para gjykatës për kryerjen e procedurave përkatëse që do të çojnë në ekstradimin e tij. Ai akuzohet në shtetin spanjoll si i përfshirë në rreth 40 episode vjedhje të banesave.
Në vitin 2019-të u denoncua dhe nga ishkryeministri Sali Berisha, se kishte marrë pjesë në grabitjen e shtëpisë së yllit të Real Madrit, Karim Benzema. Por në atë kohë, 41-vjeçari i quajti akuzat e Berishës si të stisura dhe të motivuara politikisht. Alfred Prodani u arrestua, në kuadër të operacionit koduar “Coruna”, i cili u finalizua mbrëmjen e së premtes nga forcat policore të Komisariatit të Policisë Kurbin, në bashkëpunim me Interpol Tirana.
41-vjeçari banues në Kurbin u prangos pa bërë rezistence në qytetin e Laçit, ndërsa ndalimi i tij u bë me qëllim ekstradimi drejt Spanjës. Ai ishte shpallur në kërkim, pasi Gjykata Coruna në Spanjë, në vitin 2013, ka lëshuar urdhër arresti ndërkombëtar, për veprën penale “Vjedhja me dhunë”, parashikuar nga Kodi Penal i Spanjës” informon Policia e Lezhës.
Prej 9 vitesh, Alfred Prodani mbante postin e Drejtorit të UjësjellësKanalizime në Kurbin, si përfaqësues i Partisë Socialiste. Më firmosjen e marrëveshjes së ekstradimit mes dy vendeve rreth dy muaj më parë, Interpol Tirana në bashkëpunim me drejtoritë e policive në qarqe po gjurmon të gjithë personat e kërkuar nga shteti spanjoll, me qëllim që ata atë ekstradohen dhe të përballen me drejtësinë për veprat penale që akuzohen.
