Për herë të parë pas rënies së komunizmit, besimtarët e krishterë nuk e pritën ringjalljen e Krishtit në kisha e katedrale.
Pandemia e koronavirusit i detyroi që ta përjetonin të izoluar në shtëpi.
“Kemi përgatitur vezët dhe mishin e qengjit, bukët që e bëjmë zakonisht.”
“Meshat i kemi ndjekur përmes Youtub-it.”
Në katedralen e Shën Palit, ku u mbajt mesha e mesditës së pashkëve katolike, ishin të pranishëm vetëm 30 besimtarë, pjesë e strukturave të kishës, që qëndronin larg njëri tjetrit.
Imzot George Frendo, uroi të gjithë besimtarët e krishterë duke u dhënë forcë, se ditë më të mira se këto që po kalojnë, do të vijnë.
“Edhe ne e kemi takuar Jezu Krishtin dhe ai na ka thënë që dashuria e tij të jetë ngjitëse, më ngjitëse se sa koronavirusi. Jeta jonë nuk është nën drejtimin e virusit, por në drejtimin e Krishtit.”
Edhe besimtarët e pranishëm, patën urime të veçanta, në këto ditë të pazakonta.
“Të mos e heqin shpresën nga vetja dhe të mendojnë vetëm përpara, sepse është vërtetë një armik i padukshëm, por duhet të jemi të fortë për fëmijët tanë.”
“Ai ndriçoftë ditët e jetës dhe do të na shpëtojë sepse ai ka triumfuar mbi vdekje.”
“Krishti do të na japë forcë ta kalojmë edhe këtë pandemi.”
