Kreditimi afatgjatë nga sistemi bankar u zgjerua ndjeshëm gjatë vitit 2018, duke shënuar një ndryshim të rëndësishëm pozitiv në kursin e kreditimit të ekonomisë.
Sipas statistikave nga Shoqata Shqiptare e Bankave, (AAB) kreditë afatgjata, (me maturim më të gjatë se pesë vjet), në fund të gushtit arritën në shifrën e 293 miliardë lekëve, kundrejt 277 miliardë lekë që ishin në të njëjtën periudhë të vitit të kaluar.
Sekretari i Përgjithshëm i AAB-së, Spiro Brumbulli u shpreh për ATSH-në se rritja e kreditimit në terma afatgjatë është në vetvete një sinjal pozitiv, që dëshmon se bankat janë të mirëkapitalizuara dhe kanë likuiditet për të kredituar ekonominë.
“Lëvrimi i më shumë kredive afatgjata tregon se bankat kanë mbështetur më shumë projekte të reja investimi. Portofoli i kredive afatgjata për biznesin ka arritur në 154 miliardë lekë, në rritje me 9 miliardë lekë krahasuar me një vit më parë”, bëri të ditur Brumbulli.
