Një person i armatosur ka tentuar të grabisë një bankë të nivelit të dytë në zonën e Delijorgjit në Tiranë. Autori, Bardhyl Fusha, është futur në bankë me një çantë ku do të fuste paratë dhe me kallash, madje edhe i pamaskuar. Ngjarja ka ndodhur rreth orës 11:30 në një zonë tepër të frekuentuar.
Mësohet se autori Fusha ka qëlluar një herë në dysheme me kallashnikov, por është arritur të neutralizohet nga efektivët e policisë. Ai nuk ka arritur të marrë para nga banka, ndërsa prangat i janë vënë në derën e jashtme të bankës. Sapo policët kanë mbërritur, ai mësohet t’i ketë dorëzuar çantën me kallashin brenda, siç shihet edhe në këtë foto që ka siguruar Report Tv.
“Rreth orës 11:15, në Rrugën e Kavajës, shtetasi B. F., rreth 58 vjeç, dyshohet se ka hyrë në ambientet e një banke, me qëllim vjedhjen e saj, duke qëlluar me armë zjarri, në dysheme. Nga të shtënat nuk ka shtetas të dëmtuar.
Shërbimet e Policisë kanë ndërhyrë menjëherë pas marrjes së njoftimit dhe kanë bërë të mundur kapjen e autorit të dyshuar në tentativë për tu larguar nga vendi i ngjarjes. Autori i dyshuar është shoqëruar në Komisariat.
Gjithashtu, është sekuestruar arma e zjarrit.
Në përfundim të veprimeve hetimore do të jepet informacion më i plotë për rastin”, njofton policia.
