Një 46- vjeçar është arrestuar nga policia, pasi i vodhi një tregtare në automjetin e saj që e kishte lënë të parkuar, një çantë ku brenda saj kishte 47 milionë lekë.
Mjeti ishte i parkuar në zonën e Medresesë në Tiranë, ndërsa pronarja e makinës është tregtare shumice dhe paratë janë me burim nga biznesi.
Autorti Gurjan Trajani (Mitro), e ka ruajtur tregtaren dhe më pas i ka vjedhur 47 milionë lekët në makinë, një pjesë në euro dhe një pjesë në dollarë.
46- vjeçari banues në Elbasan është arrestuar nga policia, në kuadër të operacionit policor të koduar “Përsëritësi”, ndërsa ka qenë i dënuar më parë disa herë për vjedhje.
Policia ka sekuestruar edhe shumën e parave që ai kishte vjedhur, të cilat i janë gjetur në banesë.
‘Gjatë kontrollit të banesës së 46-vjeçarit, shërbimet e Policisë kanë gjetur e sekuestruar shumën e parave që ky shtetas kishte vjedhur në automjetin e parkuar’, njoftoi sot policia.
Materialet i kaluan Prokurorisë, për veprime të mëtejshme procedurale.
