Një 26-vjeçar është arrestuar nga Policia e Fierit pasi akuzohet se vodhi një sasi me para në një biznes. Mësohet se në pranga ka rënë shtetasi Fabion Goxhaj, 26 vjeç, banues në Patos, i dënuar me parë për vjedhje.
Policia bën me dije se i riu ishte maskuar dhe kishte marrë një sasi parash në dyqanin e shtetasit K. S, duke u larguar menjëherë nga vendngjarja. Pak pas vjedhjes 26-vjeçari ka rënë në prangat e policisë, e cila u njoftua nga pronari i biznesit.
Njoftimi i policisë:
Patos, Fier
Vodhi i maskuar një sasi parash në një biznes në Patos dhe u largua, por brenda një kohe të shkurtër, u identifikua dhe u vu në pranga nga Policia.
Shërbimet e Policisë pas marrjes së njoftimit se në lagjen “29 Marsi”, Patos, një shtetas i maskuar kishte marrë një sasi parash në dyqanin e shtetasit K. S dhe ishte larguar, menjëherë kanë shkuar në vendngjarje.
Falë reagimit në kohë dhe punës së mirëorganizuar shërbimet e Stacionit të Policisë Patos bënë të mundur identifikimin, lokalizimin dhe arrestimin e autorit të dyshuar të ngjarjes, shtetasin F. G., 26 vjeç, banues në Patos, (i dënuar me parë për vjedhje).
Materialet do i kalojnë Prokurorisë pranë Gjykatës së Shkallës së Parë Fier për veprime të mëtejshme për veprën penale “Vjedhja”.
