Administratori i një lokali është vënë në pranga, pasi kishte përshtatur lokalin e marrë me qira për të organizuar lojëra fati poker.
Po ashtu, në pranga janë vënë edhe 5 persona të tjerë, pasi u kapën në flagrancë duke luajtur poker.
Ndaj tyre rëndojnë akuzat për veprën penale “Organizimi ose ushtrimi i veprimtarive të lojërave të fatit në kundërshtim me ligjin”, dhe “Vënia në dispozicion e lokaleve për lojëra të palejuara”.Policia ka sekuestruar shuma parash, çipsa, një tavolinë pokeri dhe sende të tjera.
‘Shërbimet e Komisariatit të Policisë Fier në bashkëpunim me Forcën e Posaçme Operacionale të DVP Fier, kanë finalizuar operacionin “Poker”, dhe arrestuan personat: Eduart Varfi, 47 vjeç, Haxhi Kallashi, 32 vjeç, Mikelian Begaj, 26 vjeç, Avni Tahiri, 42 vjeç, Elsjan Xhaferi, 34 vjeç, dhe Klodian Hoxhaj, 35 vjeç, të gjithë banues në fshatin Mbyet, Fier. Këta shtetas u kapën në flagrancë në lokalin e shtetasit Eduart Varfi, duke luajtur poker’, thuhet në njoftim.
Materialet procedurale i kaluan Prokurorisë për veprime të mëtejshme.
