Dy të rinj janë arrestuar nga Policia në Kukës pasi po transportonin hashash me makinë. Një tjetër i ri është shpallur në kërkim pasi ka mundur t’i largohet efektivëve të Kufirit.
Sipas Policisë, janë arrestuar në flagrancë E. I. 26 vjeç, banues në Shemri, Kukës dhe D. Zh. 19 vjeç banues në Kalimash, Kukës, ndërsa është shpallur në kërkim shtetasi E. D. 23 vjeç, banues në Shemri, Kukës.
Punonjësit e Policisë Kufitare, gjatë patrullimeve të shtuara në vendin e quajtur “Shina-Hidrovor” kanë konstatuar një mjet tip “Ford”, drejtuesi i të cilit në momentin që ka parë efektivët, ka shtuar shpejtësinë e mjetit duke lëvizur në drejtim të Hidrovorit.
Menjëherë, punonjësit e Policisë janë vënë në ndjekje të automjetit. Shtetasi E. D. braktisi mjetin dhe bashkë me dy pasagjerët tentoi të largohej në zonën e pyllëzuar në teren malor.
Shërbimet e Policisë Kufitare u vunë në ndjekje dhe bënë të mundur kapjen e dy pasagjerëve, shtetasit E. I. dhe D. Zh, ndërsa drejtuesi i mjetit mundi të largohej. Shtetasi E. D. u shpall në kërkim dhe vijon krehja e zonës për kapjen e tij.
Gjatë kontrollit të ushtruar në mjet, shërbimet e Policisë kanë gjetur rreth 1.5 kg lëndë të dyshuar narkotike cannabis sativa. Në përfundim të veprimeve, nga specialistet për Hetimin e Narkotikeve në DVP Shkodër u bë arrestimi në flagrancë i shtetasve E. I. dhe D. Zh., si dhe sekuestrimi i lëndës narkotike.
Materialet procedurale do t’i kalojnë Prokurorisë pranë Gjykatës së Shkallës së Parë Shkodër, për veprën penale “Trafikim i narkotikeve”, kryer në bashkëpunim dhe “Kalim i paligjshëm i kufirit shtetëror”.