Gjatë intervistës së saj në Euronews për gazetaren Ilva Tare, Linda Rama është pyetur edhe për ndikimin e saj te bashkëshorti, Kryeministër i Shqipërisë, i cili e quan atë “kritiken e tij të pamëshirmshme”.
Për Lindën, ballafaqimi i opinioneve mes të dyve është një proces që ndodh nga të dyja palët, i zhveshur nga egot personale, ku siç thekson ajo, përveç mekanizmit të tij arsyetues dhe gjykues, Edi Rama ka dhe informacionin që e ka shumë të gjerë.
“Për një çështje të caktuar Edi thotë mendimin e tij dhe unë them mendimin tim. Dhe ky është një proces mbi baza reciprociteti dhe i zhveshur nga egot personale, se kjo është shumë e rëndësishme. Nuk ka rëndësi kush ka të drejtë, rëndësi ka që të shkohet drejt të drejtës me kontributin e të dyve atëhere kur ne diskutojmë diçka. Ajo që do thoja unë është kjo që, dhe ju e njihni besoj tani këtë element që dua të them unë, Edi nuk është një debatues i lehtë, Edi është një debatues shumë i vështirë. Unë them gjykimin tim dhe reflektimin e Edit ti mund ta shohësh të nesërmen, mund ta shohësh pas një jave, mund ta shohësh dhe pas një muaji dhe mund të mos ta shohësh nëse është në dorën e tij të reflektojë dhe të bëjë vendimmarrje të caktuara. Por ai reflekton dhe kjo është një dinamikë shumë motivuese. Kjo të motivon…”, tha Linda Rama.
Ajo shtoi gjithashtu se përpiqet të jetë një kritike jo e bezdisshme duke qënë selektive për çka flet me bashkëshortin për tu ndalur tek ato fenomene, ngjarje, momente që mendon se paraqesin një interes të posaçëm publik.
