Agjencia e Parqeve dhe Rekreacionit dhe bashkia e Tiranës, pas aksionit të madh për mbjelljen e kurorës së gjelbër të qytetit, tashmë po punojnë për përkujdesjen e përditshme ndaj pemëve të reja të mbjella ditë pas dite jo vetëm prej tyre, por edhe nga qytetarë dhe institucione të ndryshme. Kështu, sipas Agjencisë së Parqeve dhe Rekreacionit, vijon kujdesi, një për një, për gjithë pemët e reja të mbjella në Parkun e Madh, krasitje sezonale, ujitje, prashitje, vendosje mbajtësash, trajtime me ilaçe, dizinsektime.
Ndërkaq, në fundjavë u krye kositja pastruese e çliruese në krahun juglindor të Parkut të Madh. “Siguri, parandalim zjarrvëniesh, eliminim rreziku pickimesh zvarranikësh, qarkullim më i lirshëm ngado në park, ndihmesë për bimësinë e re dekorative, kurim peisazhi!”, janë arsyet për këtë pastrim.
Po ashtu, Agjencia apelon qytetarët të tregojnë kujdes për “mushkërinë” e gjelbër të Tiranës, edhe pse punonjësit e bashkisë pastrojnë përditë. “Ka ende plot vende ku mbeturinat i gjejmë jo në kosha por përtokë! Është shumë fyese dhe aspak qytetare t’a ndotësh kështu parkun – pasurinë tënde, jo tonën. Ne jemi shërbëtor publik por gjynah që keqpërdoremi kështu. Kjo i kushton Bashkisë kohë, personel, fonde ekstra! Lekët e taksapaguesve, jo tonat!”, thuhet në një postim të Agjencisë së Parqeve dhe Rekreacionit.
