Policia e Shtetit arrestoi sot gjyqtarin Shkëlqim Miri, 46 vjeç, me detyrë gjyqtar pranë Gjykatës së Apelit Tiranë, pasi këtij të fundit iu gjetën në shtëpi një shumë e madhe monetare prej 300 milionë lekësh të vjetra.
Sipas policisë ndalimi i tij u krye në funksion të procedimit penal proaktiv të vitit 2017, për veprat penale të “Korrupsionit aktiv të gjyqtarit, prokurorit dhe funksionarëve të tjerë të drejtësisë”, “Korrupsionit pasiv të gjyqtarëve, prokurorëve dhe funksionarëve të tjerë të organeve të drejtësisë”.
Grupi hetimor kishte krijuar dyshime të arsyeshme të bazuara në prova, për favorizim e një të dënuari për veprën penale të vrasjes me dashje dhe armëmbajtje pa leje, kundrejt kërkimit dhe marrjes së përfitimeve monetare të paligjshme.
Gjykata e Rrethit Gjyqësor të Shkallës së Parë e ka deklaruar fajtor autorin dhe dënuar me 20 vjet burgim. Në Gjykatën e Apelit Tiranë është ndryshuar klasifikimi i veprës penale nga “Vrasje me dashje” në “Plagosje e rëndë” dhe aktualisht autori është liruar nga burgu.
Pra hetimet për gjyqtarin Shkëlqim Miri kishin nisur në janar 2017, pas informacioneve se gjykatat shqiptare po i jepnin lirinë Gentian Dodës, i akuzuar për vrasje dhe i ekstraduar nga Amerika pesë vjet më parë.
Por pyetja që shtrohet këtu është se pse nuk janë hetuar dhe dy gjyqtarët e tjerë që ishin pjesë e këtij vendimi për lirimin e Gentian Dodës, por për këtë rast u ndalua vetëm gjyqtari Shkëlqim Miri?
Pse dy gjyqtarët e tjerë të kësaj trupe gjykuese nuk ndalohen që ishin pjesë e vendimit, konkretisht gjyqtarja Flutura Skënderi dhe gjyqtari Agim Bendo?
Me një logjikë fare të thjeshtë arrin në konluzionin që paratë e marra për vendimin për të liruar nga burgu Gentian Dodën ndahen midis trupës gjykuese, andaj duhet që të ketë dhe një hetim për dy gjyqtarët e tjerë.
