Presidenti amerikan Joe Biden mbajti një fjalim në kryeqytetin polak të Varshavës, pasi vizitoi dje kryeqytetin ukrainas të Kievit.
Biden nisi fjalimin duke përshëndetur Poloninë si një “aleat të madh”, përpara se t’i kthehej “sulmit vrastar” të Vladimir Putin ndaj Ukrainës.
Ai deklaroi se një vit më parë “bota po përgatitej për rënien e Kievit”, i cili sot qëndron “krenar” dhe “më e rëndësishmja i lirë”, ndërsa shtoi se “e gjithë bota” u testua në përgjigjen e saj ndaj luftës me Rusinë, e cila filloi një vit më parë.
Ai shtoi se aleatët u ngritën për sovranitetin dhe demokracinë përballë luftës dhe do të vazhdojnë, “pa marrë parasysh asgjë”. Biden shtoi se Vladimir Putin ka pritur që populli ukrainas të “dorëzohet” kur tanket e tij hynë më 24 shkurt, por populli ukrainas është “shumë i guximshëm” sipas tij.
“Ne ishim shumë të bashkuar, demokracia ishte shumë e fortë. Në vend të një fitoreje të lehtë që ai perceptoi dhe parashikoi, Putin u largua me tanke të djegura dhe forcat ruse në dëshpërim”.
“Ai mendoi se NATO do të thyhej dhe do të ndahej, në vend të kësaj, NATO është më e bashkuar se kurrë më parë”, theksoi Biden.
