Ministrja e Shëndetësisë Ogerta Manastirliu, thotë se sipas projeksioneve të ekspertëve për periudhën vjeshtë-dimër, numri i pacientëve të infektuar do të rritet, dhe i atyre që do të shtrohen për trajtim spitalor po ashtu.
“Në vjeshtë-dimër do të kemi një përballje tjetër sepse do të kemi gripin dhe Covidin dhe projeksioni i ekspertëve parashikon më shumë të infektuar dhe më shumë raste në spitale. Deri në fund të vitit Urgjencës Kombëtare do ti shtohen dhe 36 ambulanca. Infrastruktura dhe burimet njerëzore janë gati. Kemi një plan përgjigje edhe me burimet njerëzore. Por kapacitetet s’janë asnjëherë të mjaftueshëm nëse e lëmë në rrjedhje të lirë këtë virus”, tha Manastirliu, në ceremoninë e dhurimit nga NATO të 60 respiratorëve të rinj për Shqipërinë.
Sipas ministres, aktualisht në sistemin tonë shëndetësor janë 173 respiratorë, ndërsa theksoi se vetëm 10% e kapacitetit është e zënë.
“Arritëm të përgatiteshim në kohë duke përgatitur strukturat e dedikuara për atë që vuajnë nga nga Covid-19. Sot me ndihmën e aleatëve të çmuar kemi dyfishuar respiratorët. Aktualisht në sistem janë 173 respiratorë.
Me financimin e qeverisë shqiptare do të rrisim kapacitetet me 44 respiratorë të avancuar, statik, për të gjithë strukturat tona spitalore, për t’iu përgjigjur të gjithë planeve tona, nëse kërkohet që të hapim pavione të veçanta në spitalet rajonale. Sot kemi vetëm 22 pacientë në terapi intensive, pra më pak se 10% e kapaciteteve tona të zëna, por kjo nuk na pengon që të rrisim kapacitetet”, tha ajo.
