Një raport i organizatës Vëzhguesi i të Drejtave të Njeriut, ngre alarmin se fëmijë të lidhur me të ashtuquajturin Shtetin Islamik janë torturuar nga autoritetet irakiane dhe ato kurde. Organizata thotë se autoritetet po mbajnë në paraburgim rreth 1,500 fëmijë të lidhur me Shtetin Islamik, ndërsa në shumicën e rasteve proceset gjyqësore janë zhvilluar në shkelje të normave dhe ligjeve ndërkombëtare.
Fëmijë të lidhur me të ashtuquajturin Shtetin Islamik janë torturuar dhe dënuar për terrorizëm nga autoritetet irakiane dhe ato kurde. Një raport i organizatës Vëzhguesi i të Drejtave të Njeriut, shton se shumë prej akuzave të ngritura ndaj të miturve të dënuar janë hartuar në kushte të dyshimta ose duke përdorur “forcën për t’detyruar ti pranojnë akuzat.”
Organizata thotë se autoritetet po mbajnë në paraburgim rreth 1,500 fëmijë të lidhur me Shtetin Islamik. Një 18-vjeçar i tregoi organizatës se ai ishte ndaluar në Irak ku autoritetet i kishin lidhur sytë dhe djegur me cigare par ta detyruar të pranonte akuzat. “Na qëllonin me tela dhe shkopinj, na kanë torturuar,” tregoi ai.
Sipas raportit të organizatës, shpesh herë të ndaluarit e rinj janë mbajtur në paraburgim në kushte shumë të rënda, ndërsa gjyqet ndaj tyre kanë qenë shpesh herë të padrejtë dhe në shkelje të normave dhe ligjeve ndërkombëtare.
Belkis Wille, një studiues i organizatës Vëzhguesi i të Drejtave të Njeriut, bën përgjegjës për këtë situatë, sistemin e drejtësisë së Irakut.
“Sistemi irakian i drejtësisë është i paaftë për të hetuar dhe drejtuar ndjekjen penale për shkelje të tilla. Ky është një sistem kriminal që nuk garanton gjykimin e drejtë dhe të paanshëm,” shton studiuesi.
