Një djalë 2-vjeçar që humbi të dyja këmbët në një aksident tragjik me tren, tani mund të ecë sërish falë punës së mjekëve që ia ngjitën sërish. Mohammed Saleh nga Mangalore, Indi, po luftonte për jetën 8 muaj më parë, pas aksidentit që i mori jetën nënës së tij, ndërsa kalonin në shinat e trenit.
Falë nxitimit të personave të pranishëm në vendngjarje dhe më pas vendosja e pjesëve të gjymtyrëve të tij në një kuti plastike të mbushur me akull, u bë i mundur shërimi i pabesueshëm. Pas një ndërhyrjeje që zgjati 7 orë, vogëlushit iu ngjitën këmbët dhe tani mund të ecë dhe të vrapojë sërish.
Në momentin e ngjarjes djali ishte i shokuar, i zbehtë dhe nuk kishte fuqi të qantë nga pafuqia, pasi kishte humbur shumë gjak. Rivendosja e një gjymtyre është ndërhyrje e ndërlikuar edhe për personat e rritur, jo më për Mohammedin e vogël. Ekspertët në spital tregojnë se ngjitja e gjymtyrëve ka ndodhur vetëm 13 herë në botë, vetëm 4 herë tek fëmijët e vegjël, ndaj ky rast është një sukses i vërtetë!