“S’kam koment”, u përgjigj Mourinho kur u pyet për transferimin e mundshëm të Ozil.
Trajneri i Manchester United, Jose Mourinho, nuk e ka mohuar transferimin e mundshëm të mesfushorit të Arsenalit, Mesut Ozil, që në fund të edicionit do të jetë lojtar i lirë.
Ozilit do t’i skadojë kontrata në fund të këtij sezoni dhe 29 vjeçari ka qenë i lidhur me një kalim të mundshëm te rivalët e Premierligë, United si dhe te gjiganti i La Ligas, Barcelona.
Një transferim i mundshëm në “Old Trafford” do të bënte që ai të bashkohet me Jose Mourinhon, me të cilin punoi për tre sezone te Real Madridi.
Trajneri portugez nuk ka mohuar asgjë kur është pyetur për interesimin e “Djajve të Kuq” për Ozil para ndeshjes me Arsenalin; “S’kam koment”, u përgjigj ai.
Teksa më pas shtoi: “Ky është futbolli. Atyre iu përfundon kontrata, Fellaini po ashtu është në fund të kontratës me United dhe ka edhe shumë lojtarë tjerë në Evropë që gjithashtu është duke iu përfunduar kontrata”.
