Për shkak të vërshimeve, nëntë familje me së paku 80 anëtarë janë evakuuar në Gjakovë, thanë të shtunën nga Agjencia e Menaxhimit Emergjent.
Këto familje, nga fshati Brekoc, janë strehuar përkohësisht në një lokacion tjetër. Në këtë fshat, një lagje të banuar kryesisht me romë, është vërshuar tërësisht për shkak të rritjes së nivelit të Lumit Erenik bëri të ditur Nehat Koqinaj, zëdhënës i Agjencisë për Menaxhim Emergjent.
Duke iu referuar gjendjes në Gjakovë, Koqinaj tha se situata aktualisht është nën kontroll dhe Agjencia ka kërkuar mbështetje edhe nga niveli qendror për sanimin e situatës.
Për shkak të reshjeve të shiut, që nisën në orët e para të 17 shtatorit, vërshime janë raportuar edhe në Rahovec.
Autoritetet kanë bërë të ditur se nga vërshimet nuk ka dëme në njerëz, por vetëm dëme materiale.
Kryetari i komunës së Rahovecit, Smajl Latifi ka bërë të ditur se ka në këtë komunë ka dëme të mëdha nga përmbytjet si pasojë e reshjeve të mëdha të shiut.
Latifi përmes një postimi në Facebook ka bërë të ditur se që nga orët e hershme të mëngjesit janë duke u ballafaquar me gjendje të rënduar, e për këtë qëllim kemi formuar edhe Shtabin Emergjent të komunës së Rahovecit.
Ai ka kërkuar përkrahjen urgjente të Qeverisë.
Zëdhënësi i Policisë së Kosovës për rajonin e Gjakovës, Sheremet Elezaj, tha për Radion Evropa e Lirë se në Gjakovë dhe Rahovec ka disa shtëpi dhe makina të dëmtuara.
“Ka vërshime në qytetin e Gjakovës dhe në disa fshatra të Rahovecit. Deri më tani, janë angazhuar edhe zjarrfikësit dhe komunat respektive. Deri më tani nuk kemi ndonjë raport se dikush ka pësuar përveç dëmeve të shkaktuara nga vërshimet, pra ka dëme në disa rrugë, automjete dhe në disa shtëpi, nëpër bodrume”, tha Elezaj.
Elezaj më vonë tha se kanë nisur pastrimin e disa rrugëve, duke shtuar se edhe një rrugë në Malishevë është bllokuar dhe e njëjta po pastrohet nga mbeturinat.
“Situata ka qenë pak më e rënduar në Gjakovë dhe Rahovec. Në Malishevë ka pasur vetëm një rrugë të bllokuar, tash veçse po bëhen përpjekjet që të pastrohet rruga nga mbeturinat. Ndërkaq, në Gjakovë përveç policisë dhe autoriteteve komunale, janë angazhuar edhe zjarrfikësit. Disa rrugë kanë qenë më të rënduara për shkak të mbledhjes së ujërave. Disa rrugë veçse janë pastruar. Rrugët nacionale nuk kanë qenë të bllokuara asnjëra”, tha ai.
Ali Morina, shef i kabinetit të kryetarit të Komunës së Rahovecit, Smajl Latifi, tha për Radion Evropa e Lirë se një pjesë e madhe e fshatrave të kësaj komune janë prekur nga vërshimet.
“Aktualisht gjendja është e qetë, reshjet janë ndërprerë, mirëpo dëme ka të jashtëzakonshme. Jemi në terren duke e inspektuar gjendjen. Ka dëme në ekonomi familjare, dëme në bujqësi, në infrastrukturë publike, në të gjitha”, tha Morina për Radion Evropa e Lirë.
Ndërkaq, në rrjetet sociale janë publikuar fotografi nga rrugët e vërshuara të Gjakovës dhe Rahovecit, ku shihen edhe makina pothuajse të mbuluara nga uji.
I gjithë vendi të shtunën është përfshirë nga moti me shi dhe shkarkime rrufesh.
