Donald Trump paralajmëroi homologun e tij, Rexhep Taip Erdogan, “mos të behet një budalla” dhe tha se historia rrezikonte ta quante atë “djall” nëse nuk terhiqej nga plani ne Siri.
Ky eshte thelbi i nje letre te publikuar nga gazetarja amerikane e Fox News, Trish Regan, leter qe thuhet se Trump i ka derguar Erdoganit, ditën kur Turqia filloi sulmet e saj në veri-lindje të Sirisë.
Letra, mban daten 9 tetor dhe u shoqeruar me shume debate, madje edhe lidhur me autenticitetin e saj, por sipas mediave te huaja me pas u konfirmua.
Trump i bën thirrje Erdoganit të bëjë marrëveshje paqeje me Forcat Demokratike Siriane, duke theksuar se gjenerali kurd, Mazllum Kobani, do të ishte i gatshëm të bënte lëshime që nuk do t’i kishin bërë kurrë më parë.
“Mos bëj të fortin. Mos u bëj budalla”, i shkruan Trump presidentit turk. “Jam munduar shumë që t’i zgjidh disa probleme tuajat. Mos e zhgënje gjithë botën. Mund të arrish një marrëveshje shumë të mirë.”- thuhet ne leter.
“S’do të duash të jesh përgjegjës për vrasjen e mijëra njerëzve. Dhe unë s’dua të jem përgjegjës për shkatërrimin e ekonomisë turke. Dhe kam për ta bërë”, thuhet me tej.
Bombardimet nga ajri u ndoqën nga një pushtim nga toka, gjë që solli vrasjen e një politikaneje kurde, sulmin e një autokolone me gazetarë dhe largimin e 275 mijë banorëve nga shtëpitë e tyre. Për këto, OKB thotë se Turqia mund të mbajë përgjegjësi për krime lufte.
Trump, ndërkohë, ka thënë se problemet midis Turqisë dhe Sirisë duhet të zgjidhen mes tyre dhe se ushtarët amerikanë s’kanë pse të rrinë në rajon.
“Situata atje është strategji gjeniale për SHBA-të. Siria është miqësore me kurdët. Dhe kurdët dinë të mbrohen. Nuk është se dhe kurdët janë engjëj”, tha Trump nga Zyra Ovale, pasi mori kritika edhe nga vetë republikanët për tërheqjen e papritur. Ata e quajtën katastrofë edhe më të madhe se tërheqja e Obamas nga Iraku. Megjithatë, Trump ka premtuar të vendosë sanksione të ashpra kundër Turqisë, nëse nuk arrihet një armëpushim.
