Timur Ivanov dyshohet se ka marrë ryshfet prej 1 milion rubla (të paktën 10,800 dollarë), njoftoi media shtetërore ruse TASS sipas CNN.
Ai u shfaq në një gjykatë në Moskë të mërkurën, i veshur me rroba të plota ushtarake ndërsa qëndronte në një kafaz xhami dhe u akuzua për marrje ryshfeti si pjesë e një grupi të organizuar ndërsa kryente punë të kontraktuara për Ministrinë e Mbrojtjes.
Nëse shpallet fajtor, ai përballet me 15 vjet burg.
Ivanov do të mbahet në paraburgim deri më 23 qershor, ka shkruar gjykata e Moskës në Telegram.
Avokati i tij, Denis Baluyev, tha se ai po apelon rastin dhe kërkoi që Ivanov të vendoset në arrest shtëpiak, sipas medias shtetërore ruse RIA Novosti.
Ivanov, i cili ka qenë në postin e tij që nga viti 2016, shihet si një “arkitekt i lartë” i luftës së Rusisë në Ukrainë dhe një aleat i ngushtë i ministrit të Mbrojtjes Sergej Shoigu. Ivanov është ende i listuar në faqen e internetit të Ministrisë së Mbrojtjes si ministër në detyrë dhe nuk ka raportime për shkarkimin e tij.
Arrestimi i papritur i një aleati të Shoigut mund të ushtrojë përsëri presion mbi ministrin e mbrojtjes, i cili është kritikuar për trajtimin e pushtimit të Ukrainës – më me forcë nga shefi i Wagner-it, Yevgeny Prigozhin, në muajt para vdekjes së tij vitin e kaluar. Pavarësisht pengesave, Shoigu është mbajtur në postin e tij nga Putin.
