Dy ditë pas grabitjes me dhunë të një çifti të moshuarish duke u marrë 12 mln lekë të vjetra janë arrestuar tre të rinj, pjesë e grupit me pseudonimin “Etalon”, ndërsa një tjetër është shpallur në kërkim.
U arrestuan E. A., 23 vjeç, A. R., 22 vjeç dhe F. R., 28 vjeç, banues në Durrës, si dhe u shpall në kërkim një tjetër. Nga operacioni u sekuestrua një makinë, katër telefona dhe vetëm një pjesë e parave që ata arritën që të grabisnin në datë 4 janar në banesën e Hiqmet Ramadanit. Gjithashtu, në automjet nga kontrolli u gjetën dhe u sekuestruan dy doza me lëndë narkotike kokainë.
Sipas policisë, ky grup, me pseudonimin “Etalon”, dyshohet se ka kryer dhe një sërë vjedhjesh të tjera në qarqe të ndryshme, për të cilat vijon puna për zbardhjen dhe dokumentimin me prova ligjore.
I moshuari Hiqmet Ramadani tregoi se dy nga autorët u futën brenda duke i lodhur me kabull të moshuarit, ndërsa më pas morën shumën e lekëve. I moshuari tha se e lidhën në fyt me kabullin e dyshekut të korrentit dhe tentuan ta mbysnin.
