Listës së gjatë të ngacmimeve dhe abuzimeve seksuale, që ia kemi humbur fillin i janë bashkuar dhe dy emra të njohur të modës, fotografët Mario Testino dhe Bruce Weber.
Kompania e famshme mediatike Conde Nast lajmëroi se nuk do ta vazhdonte më bashkëpunimin me ta, kjo për shkak të akuzave që kanë ardhur nga modelë dhe modele të shumta në drejtim të tyre.
Në deklaratë u tha se kontrata me Testino- n dhe Weber- in do të marrë fund si dhe që tani e tutje do të shikohet me kujdes kodi i sjelljes, në mënyrë që të shmangen incidente të tilla në vazhdim.
“Nisur nga këto akuza ne nuk do të kemi më të bëjmë me Bruce Weber dhe Mario Testino-n në të ardhmen. Teksa qëndrojmë në anën e viktimave të abuzimit dhe sjelljes së pahijshme duhet të pyesim veten nëse po bëjmë apo jo çmos për të mbrojtur ata me të cilët punojmë.” u shpreh Anna Wintour, drejtorja artistike e Conde Nast dhe kryeredaktore në “Vogue”.
Ndonëse me një eksperiencë disa vjeçare për firmat më në zë si: Louis Vuitton, Burberry, Michael Kors apo Chanel kjo nuk i ka shpëtuar nga bërja publike e lajmit dhe pushimi nga puna.
