Athina zyrtare ka reaguar pas deklaratës së Ankarasë se ka pezulluar marrëveshjen dypalëshe për ripranimin e emigrantëve klandestinë.
Duke shpjeguar vendimin, ministri i jashtëm turk, Mevlud Cavushoglu, citohet të ketë thënë se kjo u bë si kundërpërgjigje ndaj vendimit të drejtësisë greke për të lënë të lirë tetë ushtarakët turq që kërkuan azil pas tentativës për grusht shteti.
Sipas gazetës Hurriyet, i pyetur nëse Ankaraja do të marrë masa ndaj vendimit të drejtësisë greke, Cavushoglu u përgjigj:
“Kemi një marrëveshje për emigracionin me BE-në, e cila po zbatohet. Kemi gjithashtu një marrëveshje dypalëshe ripranimi me Greqinë. Këtë marrëveshje ripranimi ne e pezulluam”.
Në përgjigje të kësaj deklarate, mediat greke cituan burime nga qeveria Tsipras të kenë thënë se “një gjë e tillë nuk mund të ndodhë”.
“Nuk influencohet nga deklarata e zotit Cavushoglu deklarata e përbashkët BE-Turqi, ku ka një kapitull për ripranimet. Protokolli i ripranimit midis Greqisë dhe Turqisë përbën një marrëveshje ndërkombëtare dhe rrjedhimisht duhet Turqia të ndjekë rrugën e parashikuar diplomatike për çdo ndryshim të mundshëm”.
Protokolli i ripranimit midis dy vendeve fqinje është nënshkruar vite më parë dhe parashikon kthimin e emigrantëve të paligjshëm që futen në Greqi nga Turqia, në këmbim të rilokacionit të refugjatëve sirianë që ndodhen në territorin turk, në vende të Bashkimit Europian.
