–Arrestohet edhe një tjetër person në kuadër të operacionit “Mezhgorani”, që vendosi në pranga edhe botuesin dhe pronarin e UET-së Henri Çili. Sot u arrestua 25-vjeçari Aristidh Çoli banues në Këlcyrë, i cili sipas policisë e çon në total numrin e personave që janë prangosur në 36. I riu që u arrestua sot akuzohet për “Organizim të lotarive të palejuara”. Aristidh Çoli është lojtar i ekipit të Këlcyrës, i dënuar disa herë nga Komisioni i Disiplinës në FSHF-së për dhunë dhe i arrestuar për goditjen e një lojtari të Maliqit në 3 nëntor të vitit të kaluar. Ai ka rënë në përgjimet e drejtuara nga Prokuroria e Përmetit në kuadër të operacionit “Mezhgorani“. Gjatë operacionit që ka zgjatur 6 muaj, që nisi në shtator të vitit të kaluar për “Falsifikimi të kartëmonedhave” operacioni “Mezhgorani“ ka arrestuar, ndaluar dhe proceduar 53 persona.
Emrat më të bujshëm që kanë përfunduar pas hekurave janë botuesi Henri Çili, kunati i tij, por edhe biznesmeni Sait Fishta. Në total në kuadër të këtij operacioni personave të arrestuar apo ndaluar u janë sekuestruar 3 pushkë automatike me silenciator, 2 kallashnikov, 10 kallëpe tritol, 620 fishekë, 2 granata difensive, 71 krehër fishekësh, 20 automjete te markave të ndryshme, 40 telefona celular, dokumente noteriale, kontrata, certifikata pronësie të ndryshme, rreth 130 kg kanabis, shuma prej 10 milion lekësh, 7500 euro, si dhe 3500 euro të dyshuara të falsifikuara. Në këtë operacion, thotë policia u angazhuan 15 grupe të reparteve të FNSH Shkodër, Fier e Tiranë, Forca e Posaçme Operacionale në Policisë e Shtetit dhe shërbimet e DVP Gjirokastër, Tiranë, Durrës, Elbasan, Fier e Shkodër. Ndërkohë që vijon puna për kapjen e personave të tjerë të shpallur në kërkim në kuadër të operacionit “Mezhgorani”.
