Presidenti Ilir Meta është takuar mbrëmjen e sotme ne presidencë me Alexander Soros, djali i filantropit të njohur George Soros. Takimi është pasqyruar edhe nga këshilltari i presidentit për mediat, Tedi Blushi.
“Presidenti i Republikës Ilir Meta priti në një takim me kërkesë të tyre Zëvendëspresidentin e Fondacionit “Shoqëria e Hapur”, z.Aleksandër Soros dhe Drejtorin Ekzekutiv të zyrës së Fondacionit në Shqipëri, Andi Dobrushi.
Presidenti Meta i njohu me shqetësimet e Tij, të bëra edhe publike, për përpjekjet e qeverisë për kapjen e institucioneve të drejtësisë, e sidomos të Gjykatës Kushtetuese, për përkeqësimin e lirisë së medias, si dhe për domosdoshmërinë e gjallërimit të shoqërisë civile në mbrojtje të vlerave demokratike dhe të drejtave të njeriut”, shkruan Blushi.
Por çfarë deklaronte Meta për George Soros dhe fondacionin e tij në 2 korrik të këtij viti:
“Në rast se ti nuk je i pavarur të marrësh vendimet e duhura në interesin e vendit tënd, kombit tënd dhe qytetarëve të tu, unë dhe gjithë shqiptarët e ndershëm që kanë ende gjak shqiptari, do ta mbrojmë Shqipërinë nga gjithë ata miliarderë që iu duket Shqipëria një mizë lisi dhe mund të tallen si të duan me strukturat e tyre të Deep State për State Capture. Kam dy fjalë edhe për miliarderin Soros. Nuk e kam dëgjuar me vëmendje Viktor Orbanin në vitin 2000 në janar, ku po i flisja me gjithë dashuri për Sorosin, se me thënë të drejtën atëherë na ndihmoi në kohën e opozitës se dhe ai socialist është në pikëpamje, edhe më tha keni kujdes se nuk është aq demokrat sa duket dhe shpesh komploton kundër demokracisë.
Do i them Soros i uroj jetë të gjatë, i uroj suksese edhe të birit që vjen shumë shpesh në Shqipëri se vjen shpesh edhe këtu, që t’ia them nga afër se shkon edhe në Kosovë e Serbi ti gëzojë ato miliardat e veta. Shqipëria është vërtetë një vend i vogël për përmasat e tij, të vazhdojë të punojë, të investojë në tregje të mëdha, sepse Ilir Meta nuk është i rracës së Gruevskit. Është Presidenti i Shqipërisë dhe do i dalë për zot Shqipërisë. Është i rracës së politikanëve të rravës Avni Rustemi, edhe i disa shqiptarëve të tjerë si Mit Sokoli, Vojo Kushi etj.”
/ALPEnews.al
