Presidenti i Republikës, Ilir Meta gjeti kohë dje dhe u bë pjesë e debatit nëse duhet zbatuar projekti i zgjerimit të Unazës së Madhe apo jo. Reagimi i Metës erdhi vetëm pak minuta pasi edhe kreu i opozitës, Lulzim Basha, i cili edhe pse si ish-kryetar bashkie ka miratuar të gjitha projektet e ndërtimit lidhur me Unazën e Madhe të Tiranës, doli hapur pro disa banorëve që protestojnë kundër prishjes së disa njësive tregtare të ndërtuara në mënyrë të paligjshme dhe që preken nga zbatimi i këtij projekti.
Në fakt përfshirja e Metës në këtë debat ngjan si dy pika ujë me përfshirjen edhe të paraardhësit të tij në postin e presidentit, Bujar Nishanit në rastin e këndit të lojërave për fëmijët në Parkun e Madh të Liqenit. Kështu, Meta la mënjanë çështjet e nxehta në ushtrimin e detyrës së tij si Kryetar Shteti dhe vendosi dje të merret dhe me punët komunale që kanë të bëjnë me projekte zhvillimore të qytetit dhe që janë të mirëpritura nga shumica e qytetarëve të Tiranës që nuk duan të qëndrojnë për orë të tëra në trafik. Nisur nga përvoja edhe e paraardhësit të tij, Bujar Nishanit, i cili pasi shkoi dhe protestoi kundër lodrave, pa që aty të ndërtohej një nga këndet më të bukura të lodrave në rajon, ashtu edhe Meta rrezikon të ketë të njëjtin fat sa i përket suksesit të realizimit të këtij projekti.
