“Kam folur shumë herë për Mesdheun, sepse jam peshkop i Romës dhe sepse është emblematik: Mare Nostrum, një vend komunikimi midis popujve dhe qytetërimeve, është bërë varrezë”. Kështu u shpreh Papa Françesku në audiencën e zakonshme të së mërkurës në sheshin e Shën Pjetrit.
“Dhe tragjedia është se shumë emigrantë, shumica e këtyre vdekjeve, mund të ishin shpëtuar. Duhet thënë qartë ka nga ata që punojnë sistematikisht dhe me çdo mjet për të refuzuar emigrantët. Dhe kjo, kur bëhet me ndërgjegje dhe përgjegjësi, është një mëkat i rëndë”, shtoi Papa.
Sipas tij nuk janë ligjet kufizuese që shpëtojnë emigrantët, por duke zgjeruar rrugët e sigurta dhe të rregullta të aksesit për migrantët dhe duke lehtësuar strehimin.
“Ne të gjithë mund të biem dakord për një gjë: në ato dete dhe në ato shkretëtira vdekjeprurëse, emigrantët e sotëm nuk duhet të jenë atje. Por kjo nuk është me ligje më kufizuese, nuk është me militarizimin e kufijve, nuk është me refuzimet që të marrim këtë rezultat. Ne do ta arrijmë atë duke zgjeruar rrugët e sigurta dhe të rregullta të aksesit për migrantët, duke lehtësuar strehimin për ata që ikin nga luftërat, dhuna, persekutimi dhe fatkeqësitë e ndryshme; ne do ta arrijmë atë duke promovuar në çdo mënyrë një qeverisje globale të migracionit të bazuar në drejtësi, vëllazëri dhe solidaritet. Dhe bashkimi i forcave për të luftuar trafikimin e qenieve njerëzore, për të ndaluar trafikantët kriminelë që shfrytëzojnë pa mëshirë mjerimin e të tjerëve”.
