Ish-kryeministri Aleksandër Meksi ka shkruar një mesazh prekës lamtumire për ndarjen nga jeta të artistit dhe arkitektit të njohur Maks Velo, pasditen e sotme.
Ndër rreshta ish-kryeministri Meksi kujton kohën kur studionte në Institutin Politeknik dhe u njoh me Maks Velon para arrestimit të tij.
“Përshëndeteshim në xhiron përpara Dajtit deri sa të arrestuan. U ritakuam kur dole nga burgu dhe punoje te Abrazivja. Të jam mirënjohes që në skëterrën e Spaçit nuk pranove të flisje keq për mua. Nuk e harroj. U dhunove barbarisht”, shkruan ndër të tjera ish-kryeministri Meksi për ndarjen nga jeta të Maks Velos.
“RIP Maks. Njiheshim që në vitin 1955 kur unë u futa Institutin Politeknik dhe ti ishe në vitin e katërt.
U bëmë miq në vitet kur merreshe me studime të trashëgimisë arkitekturore. Përshëndeteshim në xhiron përpara Dajtit deri sa të arrestuan. U ritakuam kur dole nga burgu dhe punoje te Abrazivja. Të jam mirënjohes që në skëterrën e Spaçit nuk pranove të flisje keq për mua. Nuk e harroj. U dhunove barbarisht.
Jemi takuar shpesh që atëherë si miq të vjetër. U prehtë në paqe”, përmbyll ish-kryeministri Meksi.
