Roli i ambasadorit amerikan në Shqipëri, ka qënë gjithnjë kyç përsa i përket zhvillimeve kryesore në vend, politike por jo vetëm.
Në ditët e fundit të mandatit të tij, Donald Lu ka folur për herë të fundit duke dhënë mesazh të fortë para ikjes së tij.
Ajo që ambasadori i “mëshoi” fort vitin e fundit, ishte pikërisht procesi i Vetting-ut, reforma në drejtësi. E sigurisht, në fjalët e tij, kjo pjesë pati dhe rëndësinë më të madhë.
Ndryshe nga paraardhësi i tij Arvizu, që në mesazhin e fundit foli më tepër për politikën dhe “sjelljen” e politikanëve.
Mesazhi i Donald Lu para largimit:
“Politikanët e korruptuar duhet të kenë frikë!” Kjo është një nga frazat më të njohura të Donald Lu-së, e cila nuk mungoi as në përgjigjjet që ai i dha disa pyetjeve për ecurinë e vetting-ut dhe të ngritjes së institucioneve të reja. Optimizmi dhe besimi se procesi po ecën në drejtimin e duhur është mesazhi kryesor i ambasadorit amerikan, i cili mbështet pa rezerva organet e vetting-ut.
“Kam besim që reforma në drejtësi po prodhon rezultate reale për popullin shqiptar. Po largon gjyqtarë dhe prokurorë të korruptuar dhe të paaftë dhe po konfirmon ata të ndershmit për të vazhduar punën e rëndësishme të gjykatave. Rezultatet janë mbresëlënëse. Komisioni i vetting-ut ka shkarkuar 21 gjyqtarë dhe prokurorë si dhe ka konfirmuar 27. Ndërkohë që disa nga rastet do të apelohen, procesi përfaqëson një hap madhor përpara drejt një gjyqësori të drejtë dhe të pavarur. Qytetarët e zakonshëm tani duhet të presin të kenë gjyqtarë dhe prokurorë të rivlerësuar dhe të pastër, që nuk do të kërkojnë më ryshfete dhe nuk do t’i përgjigjen më trysnisë politike. Më në fund, qytetarët mund të kërkojnë dhe të presin drejtësi të vërtetë”, deklaron Donald Lu.
Por, a është ambasadori amerikan i shqetësuar nga vonesa në ngritjen e KLGJ-së dhe KLP-së? Ambasadori Donald Lu thotë se ndan të njëjtin shqetësim sikurse edhe opozita për vonesën në ngritjen e institucioneve të reja të drejtësisë, por beson se ky proces nuk do të vonojë.
Me këtë rast, Donald Lu ka një apel për të gjithë: “Jam dakord me opozitën se është imperative që organet e reja gjyqësore të ngrihen shpejt. Kjo do të lejojë emërimin e një prokurori me mandat të plotë, emërimin e gjyqtarëve të Gjykatës së Lartë, si dhe krijimin e SPAK dhe BKH. Besoj se jemi pranë krijimit si të KLP edhe të KLGJ. Këshillit të Lartë Gjyqësor i duhet vetëm një gjyqtar i guximshëm i gjykatave të apelit për të dalë vullnetar që të shërbejë në Këshill. Kam besim që në javët e ardhshme ky proces do të përmbyllet dhe do të ecet përpara me emërimin e gjyqtarëve të rinj, SPAK dhe BKH. Procesi i vetting-ut po funksionon. Jemi shumë pranë hyrjes në fazën tjetër të reformës”.
Arvizu veç se ishte dhe ambasadori që ndejti më gjatë në detyrë, ishte dhe ai që i “pa” të dyja forcat kryesore në qeveri. Kjo pasi qendrimi i tij në Shqipëri zgjati gjatë viteve 2010-2015.
Para se të largohej, në intervistën e tij të fundit ai bëri disa “paralajmërime” për politikanët.
“Ata që kualifikohen për të marrë vizë për në SHBA, duke nisur nga nesër, do kenë mundësinë që ta kenë atë për tre vjet. Pra, viza e marrë është tri vjeçare”, ka thënë Arvizu. Ai i ka dhënë dhe një mesazh të fundit mazhorancës, që të mos jetë arrogante. “Ndoshta politikanët duhet të jenë të kujdesshëm kur shprehen. Të pasurit një mazhorancë të fortë është një luks politik por edhe një detyrim, sepse atë mazhorancë e kanë votuar njerëzit. Mos jini shumë arrogantë, ky do të ishte mesazhi im për mazhorancën”, tha Arvizu.
Përgatiti: AlpeNews.al