Virtues Entela duket se do të jetë vendi i “strehimit” për lojtarët e Kombëtares shqiptare këtë sezon. Pas mbrojtësit Naser Aliji që ishte pa ekip, në klubin e Serisë B italiane pritet të transferohet edhe sulmuesi Azdren Llullaku.
E ardhmja e 29-vjeçarit është rrethuar nga misteri dhe befasia. Kjo për faktin se pas prishjes së kontratës me Astanën, u duk sikur karriera e Llullakut do të vazhdonte në Premierligën kazake me Ordabasin.
Prej disa ditësh sulmuesi i ishte bashkuar ekipit të ri në Turqi për fazën përgatitore, madje në miqësoren e së mërkurës, të barazuar 2-2 me çekët e Sllovacos luajti titullar dhe shënoi njërin prej golave të skuadrës së tij.
Entuziazmi për këtë paraqitje u venit shumë shpejt, pasi Llullaku dhe klubi i Ordabasit nuk firmosën kontratë, pasi nuk ranë dakord për detajet e marrëveshjes.
Prej situatës së krijuar, kuqeziu mori menjëherë avionin drejt Bolognas, ashtu siç e konfirmoi edhe në faqen e tij në “Instagram”.
Udhëtim jo i rastësishëm, sepse në Itali është fare pranë mbylljes së akordit me Virtus Entellan.
Edhe pse merkato në Serinë B është mbyllur, djaloshi nga Istogu mund të përfitojë nga rregulli i transferimit si lojtar i lirë dhe mund të realizojë ëndrrën për të luajtur në vendin ku është rritur dhe pranë familjes së tij.
