Kancelarja gjermane, Angela Merkel, e ka lavdëruar Turqinë për mënyrë se si është marrë me refugjatët, por ka thënë se, në të njëjtën kohë, është shumë e brengosur për mosfunksionimin e sundimit të ligjit, si dhe ka shprehur përkrahje për uljen e fondeve të BE-së për Ankaranë në kuadër të përpjekjes së saj për t’iu bashkuar bllokut.
“Në aspektin e vlerave demokratike, në Turqi ka pasur zhvillime shumë negative. Jo vetëm se gjermanët po arrestohen, por i tërë sundimi i ligjit në Turqi është duke lëvizur në drejtim të gabuar. Jemi shumë të brengosur për këtë. Unë do ta mbështes uljen e fondeve në kuadër të para anëtarësimit në bllok”, ka thënë ajo
Ajo ka theksuar se me refugjatët, Turqia ka bërë një punë të mirë.
“Duhet po ashtu ta bëj të qartë se Turqia është duke bërë punë të madhe me refugjatët. Kemi obligime në marrëveshjen Turqi-BE. Kemi premtuar 3 miliardë euro për vitet e ardhshme përveç 3 miliardëve që veçse i kemi ndarë. Duhet ta përmbushim këtë premtim”, ka shtuar ajo.
