Ditën e sotme u njoftua nga mediat italiane se autoritetet shqiptare në bashkëpunim me ato italiane arritën të shkatërronin një grup kriminal që trafikonte lëndë narkotike.
Autoritetet arrestuan 37 persona të përfshirë dhe sekuestruan 3.5 ton drogë me vlerë 40 milion euro, ndërsa janë vënë në sekuestro edhe pasuritë e të arrestuarve me vlerë 4 milion euro.
Kreu i SPAK Arben Kraja së bashku me kreun e Antimafias italiane kanë mbajtur një konferencë të përbashkët për shtyp.
Kraja u shpreh se ka qenë vetë i pranishëm në ndjekje të këtij operacioni, ndërsa shprehet se çdo përgjegjës nga autoritetet që ka favorizuar aktivitetin kriminal do të dërgohet para përgjegjësisë.
“Kam ardhur në Romë në 7 shkurt dhe kam firmosur një memorandum me autoritetet italiane për bashkëpunimin mes prokurorive tona. Skuadrat e përbashkëta hetimore janë përgjigja më e mirë që mund t’i jepet krimit të organizuar. Dua të falenderoj EUROGJAS për këtë ndihmë që na ka dhënë. Operacioni i përbashkët ishte i suksesshëm mes dy strukturave policore dhe dy prokurorive. E reja që kemi sjellë në Shqipëri është fakti që nuk kemi arrestuar vetëm personat përgjegjës, por kemi arritur të sekuestrojmë produktet e veprës penale. Jemi të vendosur që edhe ekipet e tjera të përbashkëta të vazhdojnë me të njëjtin ritëm dhe seriozitet për përfundimin e misioneve të tjera me të njëjtin rezultat pozitiv. Do hetojmë deri në detaje përgjegjësit e autoriteteve që kanë favorizuar këtë aktivitet kriminal. Kushdo që të jetë i përfshirë do të dërgohet para përgjegjësisë penale. Besoj në bashkëpunimin tonë të mëtejshëm”, tha Kraja ndër të tjera.
