Disa të shtëna me breshëri plumbash në murin e një banese ngritën “në këmbë” policinë e Vlorës dhe tmerruan familjarët e një shtëpie.
Ngjarja ndodhi në orët e mesnatës së kaluar ku disa persona ende të paidentifikuar kanë qëlluar me armë në drejtim të shtëpisë së 26-vjeçarit Xhulio Mara në Selenicë,.
Fatmirësisht nga të shtënat nuk pati persona të lënduar.
Për këtë ngjarje të rëndë ka folur edhe i riu, i cili ka deklaruar për “BalkanWeb” se autorët kanë zbrazur më shumë së njëzetë plumba drejt shtëpisë së tij. Ai ka treguar se plumbat kanë depërtuar edhe në banesë, ndërsa shton se nuk ka patur konflikt me asnjë person.
Deklarata e të riut:
Mbrëmë rreth orës 1 pa 20 dëgjuam të shtëna, dhe menduam se kishin gjuajtur jashtë. Në mëngjes i pamë që kishin gjuajtur portën, muret, erdhi Policia dhe gjeti rreth 30 gëzhoja. Ka pasur dy armë të ndryshme me të cilat është qëlluar, nuk kam pasur asnjë konflikt me asnjë person. Jam në hallin tim, në punën time. Policia vazhdon hetimet, mund të kenë qenë dy deri në tre persona.”
Policia ndërkohë vijon punën për zbardhjen e plotë të kësaj ngjarjeje.
