Aktori Laert Vasili ka zvilluar sot një bisedë në internet me shkrimtarin e njohur arbëresh Mario Caliva.
Ndër të tjera ata kanë diskutuar edhe për disa figura të rëndësishme arvanitase dhe arbëreshe. Vasili tha se është rritur me të dyja gjuhët, atë greke dhe atë shqipe, ndaj mund të identifikojë se dialekti arvanitas por edhe ai arbëresh përdorin shumë fjalë greke.
Aktori Vasili tha se arvanitasit kanë shkuar në Greqi në shekullin e 11-ë, dhe kanë zgjedhur me dëshirë të flasin greqisht, ndonëse shumë historianë, ndër ta edhe arvanitas, nuk do të ishin aspak dakort me këtë deklaratë.
“Hora arbëreshe, fjala “hora” është greqisht. Ka shumë fjalë që përdoren greqisht nga arbëreshët, ka shumë fjalë që përdoren greqisht nga arvanitasit. Dhe unë jam rritur me të dyja gjuhët. Ata kanë vajtur që në shekullin e 11-të në Greqi, dhe nuk e ndjejnë veten e huaj aty, por e kanë pranuar që kjo është gjuha jonë, por gjuha zyrtare është greqisht dhe ne do flasim greqisht.
Kemi edhe arnautët në Turqi, që janë shumë. Shqiptarët do të fillojnë të ndërgjegjësohen, sepse nuk kanë pse e fshehin, se historia ka luajtur pak keq me shqiptarët. Ke familje në Francë që nga koha e Napolonit që janë me origjinë shqiptare. Do ishte mirë të bëhej një zgjim i ndërgjegjes kombëtare. Nuk ka rëndësi ku jeton, të ruajmë gjuhën”, tha Vasili.
