Sot do t’i jepet lamtumira e fundit regjisores Arzana Kraja, që ndërroi jetë dje. Motra e të ndjerës, Gresa Kraja ka bërë të ditur se varrimi i regjisores do të bëhet në ora 14:00, në varrezat e Dragodanit në Prishtinë.
Trupi i saj i pajete eshte gjetur në lagjen “Kalabria” në Prishtinë. Policia e Kosovës ka dhënë njoftimin për gjetjen e trupit të pajetë, ndërkohë Qendra Kinematografike e Kosovës ka konfirmuar se bëhet fjalë për Arzana Krajën.
Në vendin e ngjarjes tashmë ka dalë edhe Prokuroria e cila ka konstatuar se ka vdekur një grua.
“Prokuroria ka dalë në vend të ngjarjes, është konstatuar se ka vdekur një grua. Po cilësohet si rast i dyshimtë, trupi është dërguar për obduksion me urdhër të prokurorit”, ka thënë Prokuroria.
Rreth rastit për Express ka folur edhe një dëshmitar sipas të cilit trupin e pajetë të Arzana Krajës fillimisht e kishte gjetur i dashuri i saj. Ndërkohë ai shton se të ndjerën e kishte parë një ditë më parë dhe se nuk kishte vërejtur asnjë ndryshim në sjellje dhe se ka qenë mirë.
Konfirmimin për vdekjen e ka dhënë edhe Policia e Kosovës.
“Me datën 13.11.2019 rreth orës 09:08 policia ka pranuar një informatë, për një trup të pajetë në lagjen “Kalabria”, Prishtinë. Njësitë policore kanë dalë menjëherë në vendin e ngjarjes, përfshirë edhe ekipin mjekësor të emergjencës, i cili ka konstatuar vdekjen e personit të gjinisë femërore”, thuhej në përgjigjen e policisë.
Në anën tjetër, familjarë të saj kanë thënë për Express se nuk i dinë ende rrethanat por besojnë qe është vdekje e natyrshme, pasi që Kraja kohëve të fundit kishte pasur probleme me shëndetin. /GazetaExpress/
