Një tjetër shqiptar është vënë në pranga pasi ka sulmuar seksualisht një vajzë greke. Ai është përsëritës, thotë Policia vendase për të njëjtën vepër penale, ndërkohë që vajza ka dhënë dëshmi ditën e djeshme për mediat.
Ajo ka treguar gjithë episodin, ndërkohë që shqiptari që e kishte sulmuar ishte i njohur i saj, pasi vajza dhe ai kishin shoqëri të përbashkët. Mediat greke kanë publikuar dëshminë e 20-vjeçares, e cila i shpëtoi një tentative përdhunimi nga një shqiptar mbrëmjen e të shtunës në Nice, ndërsa kthehej nga një festë. Siç thotë ajo, ngjarja ka ndodhur tre minuta larg shtëpisë së saj, ku autori e ka rrahur pa mëshirë për ta përdhunuar. “Sulmi ndodhi tre minuta larg shtëpisë sime.
Unë qëndrova nën një ballkon derisa shiu të pushonte dhe ai ishte fshehur. E pashë, kishte shumë plagë në fytyrë, kishim të njohur të përbashkët dhe dija disa gjëra për këtë njeri. Mënyra se si ai po më shikonte më trembi. E kuptova se kush ishte dhe u tremba shumë”, thotë ajo për “protothema.gr”.
“Kur nisa të largohesha, nuk e kuptova se kur erdhi nga pas, por papritmas ndjeva një dorë që më mbylli gojën dhe hundën dhe filluam të përlesheshim. Një grua dëgjoi britmat e mia, unë bërtita ‘ndihmë’, ndërsa ai më godiste në kokë. Më kujtohet kur ai pushoi së godituri, unë vrapova pavarësisht goditjeve në fytyrë. Koka më është fryrë, syri, vetulla më janë fryrë të gjitha”, vazhdon ajo. Shqiptari u arrestua në orët e para të së dielës, 6 nëntor.
Ai akuzohet për tentativë për përdhunim dhe rrahje brutale të 20-vjeçares. Pas sulmit, 20-vjeçarja është dërguar në Spitalin e Përgjithshëm Shtetëror të Nicës ku i është dhënë ndihma e parë dhe i është nënshtruar analizave.
Mediat greke raportojnë se shqiptari ishte liruar nga burgu pak kohë më parë teksa vuante dënimin për vepra seksuale. Para arrestimit të shqiptarit ka pasur edhe dy denoncime të tjera nga gra për tentativë përdhunimi në të njëjtën zonë. Punonjësit e Policisë në ngarkim të rastit kanë njoftuar dy gratë që kanë bërë denoncimin, u kanë treguar personin, por sipas mediave greke, asnjëra prej tyre nuk ka mundur ta identifikojë si sulmuesin e mundshëm.
