Skenat që do të kishin qenë të paimagjinueshme vetëm një javë më parë, vazhduan të shpalosen të Premten në të gjithë Kabulin, pothuaj aq shpejt sa talebanët morën nën kontroll Afganistanin.
Khalil Haqqani, një udhëheqës i një prej fraksioneve më të fuqishme dhe të dhunshme talebane, u shfaq në lutjet e së Premtes, pika më e lartë në javën islame.
Haqqani, 48 vjeç, është në listat terroriste të Shteteve të Bashkuara dhe Kombeve të Bashkuara. Së bashku me disa anëtarë të familjes së tij, ai tani po luan një rol të spikatur në regjimin e ri taleban.
I mbështetur nga shërbimi inteligjent pakistanez, rrjeti Haqqani, siç njihet fraksioni i familjes së tij, ka qenë prej kohësh një nga degët më efektive dhe më të dhunshme të talebanëve, përgjegjës për rrëmbimin e amerikanëve, fillimin e sulmeve komplekse vetëvrasëse dhe kryerjen e vrasjeve të shënjestruara.
Për shumë afganë dhe të huaj që kanë ndjekur luftën, dalja e Haqkanit në kryeqytet ishte një kujtesë e fortë se kush drejton tani Afganistanin. (Ajo që bie në sy është fakti që ai mban një armë amerikane).
