Kryeministri Edi Rama ka komentuar deklaratat e kancelarit gjerman Olaf Scholz nga Prishtina, se së shpejti përitet të ketë një Samit të Ballkanit Perëndimor në atë që njihet si Procesi i Berlinit.
Në një intervistë të dhënë nga Selaniku, Rama tha se riangazhimi i Gjermanisë në Procesin e Berlinit është një lajm i mirë për rajonin. Ai shtoi se rivitalizimi i kësaj nisme nuk e pengon Ballkanin e Hapur, pasi nuk janë konkurruese me njëra tjetrën por komplementare, Open Balkan sipas tij është një nismë në nivel praktik, ndërsa Procesi i Berlinit në nivel parimor.
Pjesë nga intervista:
Pyetje: Zoti kryeministër, ka patur një deklaratë së fundmi të Kancelarit gjerman Scholz i cili po viziton e po zhvillon turin në Ballkan, i cili ka lajmëruar një samit të radhës të vendeve të Ballkanit Perëndimor, nisma e Berlinit që njihet, çfarë të reja priten nga kjo dhe deri kur të ndodhi ky samit do ketë zhvillime të reja për Shqipërinë dhe Maqedoninë të cilat presin datën 23 qershor?
Kryeministri Rama: Natyrisht që rimarrja e Procesit të Berlinit pas ndryshimit në kancelari dhe riangazhimi i Kancelarisë dhe personalisht i kancelarit gjerman për Procesin e Berlinit është një lajm i mirë. Procesi i Berlinit është një le të themi, vijë sjelljeje e vendeve të Ballkanit Perëndimor dhe është një hapësirë ku janë vendosur si të thuash ato piketa të cilat janë objektiva konkretë dhe nxitje për punë konkrete në Ballkanin e Hapur. Pra, Procesi i Berlinit dhe Ballkani i Hapur jo vetëm që nuk janë dy nisma kundërshtuese, nuk janë as dy nisma konkurruese, po janë dy nisma komplementare ku njëra është në një nivel parimor, tjetra është në nivel konkret. Ballkani i Hapur është një njësi e zbatimit të Procesit të Berlinit.
