Mbrëmjen e sotme në vendin tonë mbërritën 38400 dozat e AstraZeneca që do të shërbejnë për nisjen e procesit të vaksinimit për mësuesit dhe pedagogët nga dita e nesërme. Të pranishëm në aeroportin e Rinasit kanë qenë të pranishëm kryeministri Edi Rama dhe ministrja e Shëndetësisë, Ogerta Manastirliu.
Rama tha se disa shkolla në të gjithë vendin do të kthehen në qendra vaksinimi që do të bëjnë dhe vaksinimi e mësuesve me dozat e vaksinës AstraZeneca. Kryeministri Rama bëri gjithashtu të ditur se gjatë muajit prill do të vijnë edhe 60 mijë doza të tjera nga AstraZeneca dhe 30 nga Pfizer.
“Nesër do të nisim menjëherë vaksinimin e mësuesve dhe pedagogëve dhe do ta shtrimë me shpejtësi në të gjithë territorin e vendit, një pjesë të shkollave do i kthejmë në pika vaksinimi. Së shpejti do të vij një tjetër sasi e konsiderueshme dhe nga AstraZeneca kemi edhe 60 mijë doza për të marrë në prill dhe 30 mijë nga Pfizer po në prill. Kjo për të thyer sa më shumë zinxhirin e infektive dhe lehtësuar sezonin turistik”, tha Rama.
Rama bëri të ditur se nga nesër do të lidhen kontaktet me autoritete në Kosovës që bluzat e bardha në spitalet COVID atje të vijnë të vaksinohen në Kukës.
“Nga nesër jemi gati që së bashku me Kosovën për të vaksinuar bluzat e bardha të spitaleve COVID atje të bëjnë vaksinën në Kukës. Kjo pengesë e tmerrshme e mungesës së dozës parë dhe më tutje shpresoj se Kosova do të ketë dozat e saj”, tha Rama
Përtej debatit në disa shtete, në Shqipëri vaksinat e AstraZeneca-s do të përdoren në çdo grupmoshe. Shefja e ISHP-së, Silva Bino tha ditën e djeshme se kjo vaksinë është e sigurt dhe e efektshme te të gjitha moshat, jo vetëm mbi 65-vjeç. Studimet e kanë vërtetuar një gjë të tillë, shtoi Bino, për këtë arsye Italia dhe Gjermania janë tërhequr nga vendimi për të vaksinuar me AstraZenica vetëm mbi 65-vjeç dhe e kanë shtrirë atë në të gjithë popullsinë.
Që nga fillimi i vaksinimit janë kryer 22,693 vaksinime për personelin shëndetësor dhe të moshuarit.
