Kryeministri i Kosovës, Albin Kurti, gjatë përurimit të një parku në fshatin Davidovc të Komunës së Shtimes i ka cilësuar si të padrejta “masat ndëshkuese” të Bashkimit Evropian ndaj Kosovës.
“Këto nuk janë sanksione, por janë masa të përkohshme dhe të padrejta për shkak se Kosova dhe qeveria e saj janë demokratike, pro-evropiane dhe progresiste. Në anën tjetër kemi një përballje të vazhdueshme me forma të ndryshme të agresionit të Serbisë që është shtet autokratik dhe pro-Rusisë”, ka thënë kryeministri.
Ai ka deklaruar se Qeveria e Kosovës nuk mund të bëjë kompromis me sundimin e ligjit dhe as me kushtetutshmërinë e vendit, andaj do të vazhdojë me zbatimin e programit të saj qeveritar, teksa ka shprehur shpresën se “masat e përkohshme” do të jenë të shkurtra.
“Sido që të jetë ne e bëjmë punën tonë, por le të mos harrojmë që nuk mundemi të bëjmë kompromis as me sundimin e ligjit as me kushtetutshmërinë e vendit tonë, andaj ne do të vazhdojmë me zbatimin e programit tonë qeveritar”, ka thënë kreu i ekzekutivit kosovar.
“Shpresojmë që këto masa të përkohshme do të jenë fort të shkurtra, ashtu që edhe mbështetja edhe ndihma evropiane të jenë të plota për shkak se Kosova është një vend që ka nevojë për mbështetje në zhvillimin e saj”, ka shtuar ndër të tjera kryeministri i vendit.
Ajo që veçse ishte paralajmëruar prej kohësh është bërë realitet – Kosova është futur për herë të parë në mesin e shteteve të pakta që janë nën sanksionet e Bashkimit Evropian dhe Shteteve të Bashkuara të Amerikës, ndërsa ashpërsia e të cilave parashihet të rritet varësisht rrethanave.
Sanksionet do të përfshijnë pezullimin e pjesëmarrjes së Kosovës në ngjarjet e nivelit të lartë dhe vizitave blaterale nga BE-ja dhe vendet anëtare veç e veç, ndërsa takime do ketë vetëm kur ato duhet të zhvillohen për t’u fokusuar në adresimin e krizës në veriun e Kosovës.
Do të ketë edhe pasoja financiare për Kosovën dhe pezullim substancial të financimit nga ana BE-së në disa projekte për të cilat ka dhënë propozime Kosova në kuadër të fondit investues për Ballkanin Perëndimor, derisa kryeministri Kurti të reflektojë dhe të ndjekë kursin e Perëndimit.
Shtetet e Bashkuara të Amerikës tashmë e kanë përjashtuar Kosovën nga stërvitjet ushtarake ndërkombëtare të udhëhequra nga NATO-ja Defender Europe 23, duke e cilësuar këtë si masën e parë ndëshkuese ndaj Kosovës për shkak të moszbatimit të kërkesave të bashkësisë ndërkombëtare.
