Gjykata e Tiranës ka vendosur masën e sigurisë “arrest me burg” për 34 vjeçarin që masakroi me sende të forta kunatën e tij.
Gjykata vlerësoi se ka prova të mjaftueshme që i dyshuari ka vrarë 38 vjeçaren. Duke iu referuar rrezikshmërisë së veprës penale dhe rrezikshmërisë së personit, kërkesa e prokurorisë për arrest në burg është e drejtë dhe duhet pranuar.
Shtetasi Erden Çapoku masakroi kunatën mbrëmjen e së enjtes në zonën e Paskuqanit në rrethinat e Tiranës. Ai e goditi disa herë me shkop dhe thikë gruan Enkeleda Çapoku, bashkëshorti i së cilës ndodhet në burg i akuzuar për shitje narkotikësh. Autori i krimit të rëndë tha se ka qenë i alkoolizuar natën që kreu vrasjen makabre.
Sipas këtij materiali, rezulton se mes viktimës dhe autorit të dyshuar kishte pasur një konflikt, për të cilin ka qenë në dijeni edhe bashkëshorti i Enkeledës, që aktualisht ndodhet në burg për trafik droge. Këtë fakt e ka pohuar kunati tjetër i viktimës, Ervin Çapoku, i cili është marrë në pyetje nga oficerët e Policisë Gjyqësore.
Ai ka deklaruar se në fund të dhjetorit, është takuar në burg me vëllain e tij, bashkëshortin e viktimës, dhe ky i fundit i ka kërkuar që t’i fliste vëllait tjetër, autorit të dyshuar, pasi kishte frikë se mos bënte ndonjë skandal. Duke i kërkuar që t’i thoshte Erdet Çapokut se nuk kishte punë me gruan e tij.
