Plot 10 persona janë arrestuar ditën e sotme nga policia me akuzën e falsifikimit të dokumentave të pronave në bregdetin e Spilles dhe të Gjirit të Lalzit. Po ashtu, për këtë rast, policia e Durrësit ka arrestuar 4 ish-zyrtarë pasi akuzohen për “abuzime me pronat”.
Ish-Komuna Ishëm jepte me qira plazhet duke u bazuar në VKM e miratuar një vit më pas. Shfrytëzimi i dhënies me qira të hapësirave publike, kryesisht atyre plazhe janë kryer në procedura flagrante ligjore. Ish-Komuna Ishëm ka dhënë 10 leje me qira duke u bazuar në një VKM që miratimi ka kaluar një vit pas lidhjes së këtyre kontratave, i cili kohështrirjen e përcakton deri në 3 vjet dhe jo 10 vjet siç dhe kanë proceduar këto ish-funksionarë shtetërore.
Por, ky skandal nuk quhet i vetëm në llojin e tij. Mjaton të kujtojmë të bujshmin e Kavajës ku plot 11 veta u arrestuan pasi tjetërsuan 36 hektarë pronë publike në bregun e detit, në zonën e Spillesë, duke ua kaluar në pronësi shtetasve të ndryshëm, nëpërmjet fallsifikimit të dokumentave dhe shpërdorimit të detyrës.
Ish-kryeregjistruesi i Hipotekës së Kavajës, në bashkëpunim me disa zyrtarë të institucionit të tij, si edhe me mbështetjen e ish-zyrtarëve të komunës Kryevidh, kanë ndryshuar zërin kadastral nga “ranishte” në “tokë arë”.
Kush ishin të arrestuarit:
1.Fatos Kaja, ish-zyrtar i komunës Kryevidh, Kavajë (aktualisht, nënprefekt i qarkut Tiranë)
2.Seid Cikalleshi, ish-kryeregjistrues i Hipotekës Kavajë
3.Dritan Kazazi, hartograf, ZVRPP, Kavajë
4.Andi Gjeci, jurist, ZVRPP, Kavajë
5.Ilir Kaja, zyrtar i Njësisë Administrative Kryevidh, Kavajë
6.Nezir Lecini, ish-shef i Zyrës së Kadastrës, Kavajë
7.Agron Xhelezi, ish-kryetar i Komisionit të Ndarjes së Tokave, Kavajë
8.Enver Duqi, ish-Drejtor i Administrimit dhe Mbrojtjes së Tokës, Kavajë
9.Altin Çoba, drejtor i ALUIZNI-t, Kavajë
10.Behgjet Pjeci, ish-kryetar i komunës Kryevidh, Kavajë
11.Dashnor Çullaj, ish-zyrtar i komunës Kryevidh, Kavajë
Gjithashtu një rast i ngjashëm ka ndodhur edhe në Shkodër tre ish-zyrtarë të komunës Shalë, janë të akuzuar për “Shpërdorim detyre” në bashkëpunim, pasi kanë shpërndarë rreth 41.500 m2 tokë në zonën turistike të Thethit në kundërshtim me ligjin.
E gjitha dukej se kishte ardhur nga ish-kryetari i Komunës Shalë (Theth), Dedë Tonaj.
Në bashkëpunim me ish-vartësit e tij, Tom Shyti dhe Gjovalin Lokthi kanë fallsifikuar dokumenta zyrtarë, në bazë të të cilëve persona të ndryshëm janë bërë pronar të pronave në zonën turistike pa pasur asnjë të drejtë ligjore per përfitim të pronësisë.
Pesë zyrtarë të Agjencisë së Kthimit dhe Kompensimit të Pronave u arrestuan pasi akuzohen se në bashkëpunim me njëri tjetrin, duke përfituar nga pozita zyrtare dhe nëpërmjet falsifikimeve, i kanë kthyer trashëgimtarëve të familjes Jenisheri një pronë prej 79 dynym, duke e spostuar pronën e kthyer nga vendndodhja reale në bregdetin e Komunës Gos Kavajë, si dhe duke ndryshuar dhe zërin kadastral nga tokë ranishte në arë.
Kush janë të arrestuarit:
Bledar Dervishaj, 35 vjeç, banues në Tiranë, ish-Drejtor i Zyrës Rajonale të Kthimit dhe Kompensimit të Pronave Tiranë. Si dhe, në kohën e arrestimit, rezultonte këshilltar i ministrit të Drejtësisë, Ylli Manjani.
Ali Aliaj, 50 vjeç, banues në Tiranë, ish Përgjegjës i Sektorit Juridik në Zyrës Rajonale të Kthimit dhe Kompensimit të Pronave Tiranë.
Dhimitër Papa, 49 vjeç, banues në Tiranë, ish Topograf në Zyrës Rajonale të Kthimit dhe Kompensimit të Pronave Tiranë.
Merita Gjinali, 49 vjeç, banuese në Tiranë, ish topografe në Zyrën Rajonale të Kthimit dhe Kompensimit të Pronave Tiranë.
/AlpeNews.al/
