Detaje të reja nga masakra në qytetin e Elbasanit mbrëmjen e djeshme rreth orës 21:15 minuta. Tre personat që mbetën të vrarë mbrëmë Endrit Alibej, Arben Dylgjeri dhe turku Erdal Durunay kishin pak ditë që kishin ardhur për festat në Shqipëri. Endrit Alibej (Dylgjeri) jetonte në Holandë, xhaxhai i tij Arben Dygjeri ishte emigrant në Angli dhe rezulton pa precedent, ndërsa turku dyshohet bashkëpunëtor i Endritit. Shënjestra e atentatit ka qenë Endrit Alibej, pasi bashkë me të vëllanë Andrea Alibej ishin drejtuesit e një grupi kriminal të goditur në 2013 në Itali, ku u arrestuan 34 persona, mes tyre 12 shqiptarë, ndërsa u sekuestrua kokainë me vlerë 10 mln euro. Nuk dihet se si Alibej ka mundur ti shpëtojë drejtësisë italianë me vetëm 5 vite burg.
Autorët i kanë ndjekur rrugës nga Peqini në Elbasan dhe në afërsi të Kombinatit Metalurgjik në Bradashesh i kanë bërë pritë makinës duke i qëlluar me breshëri. Pas të shtënave, automjeti ku ndodheshin shqiptarët bashkë me turkun ka humbur kontrollin dhe është përplasur me rrethimin e një restoranti. Kanë qenë familjarët vetëm pak metra larg vendit ku ndodhi krimi që janë përballur të parët me ngjarjen e rëndë. Ata i kanë dërguar në spitalin e Elbasanit, por asnjëri prej tre personave nuk mundi t’u mbijetojë plagëve të marra, pasi ishin qëlluar edhe në kokë dhe humbën jetën në vend. Autoret mendohet se janë vrasës me pagesë duke parë dinamikën e ngjarjes.
Nuk dihet sa persona kanë marrë pjesë në vrasje dhe sa automjete kanë përdorur, ndërsa u raportua se janë larguar në drejtim të fshatrave të Peqinit. Mbrëmjen e djeshme pas ngjarjes u shoqëruan 15 persona, të cilët u liruan pas marrjes së dëshmive, ndërkohë që në Elbasan zbarkoi drejtori i Policisë së Shtetit dhe RENEA duke blinduar zonën për të rënë në gjurmët e autorëve. Sipas të dhënave të para shkak i ekzekutimit ka qenë përplasja për pazaret e drogës, ndërsa vijojnë hetimet.
