Në Shqipëri ata figuronin me dosje të pastër. Kishin vetëm ditë që kishin mbërritur në Shqipëri dhe mbrëmjen e së shtunës po festonin me familjen në një lokal në një fshat të Peqinit. Ku po ktheheshin për në Elbasan, iu bënë pritë në hyrje të qytetit, pikërisht në zonën e Metalurgjisë.
Burime nga policia thonë se atentati ku mbetën të vrarë tre persona është kryer nga vrasës me pagesë dhe është qëlluar nga dy armë automatike.
Plumbat i morën jetën Endrit Alibej, një person me precedentë të mëparshëm penalë në Itali, që njihej edhe me mbiemrin Dylgjeri dhe jetonte në Holandë; xhaxhait të tij Arben Dylgjeri që ishte emigrant në Angli dhe rezulton pa precedentë, ndërsa viktima tjetër shtetasi turk Erdal Durunay dyshohet bashkëpunëtor i Endritit në krimin e trafikut ndërkombëtar të drogës.
Shënjestra ishte Endrit Alibej
Ai bashkë me të vëllanë Andrea Alibej ishin drejtuesit e një grupi kriminal të goditur në 2013-ën në Itali, ku u arrestuan 34 persona, mes tyre 12 shqiptarë, ndërsa u sekuestrua kokainë me vlerë 10 mln euro.
Prokuroria e Astit kishte rënë në gjurmët e këtij grupi, i cili trafikonte kokaine nga Holanda drejt Italisë. Por edhe pse në atë kohë u cilësua si koka e grupit kriminal, ende nuk dihet se si Endrit Alibej u la i lirë nga drejtësia e italiane.
Hetimi
Policia beson se autorët kanë ndjekur hap pas hapi Endrit Alibej. Sapo automjeti ku ai udhëtonte është shkëputur nga dy automjetet e tjera ku udhëtonin familjarët, autorët kanë hapur zjarr. Për nga përgatitja e këtij atentati, nga i cili fatmirësisht shpëtuan fëmijët e gratë e viktimave, policia ka dyshime të forta se autorët janë vrasës me pagesë.
