“Më fal vëlla, më falni të gjithë!”. Me këtë frazë të publikuar në profilin e saj të “Facebook”-ut, menjëherë pasi mësoi lajmin për vrasjen e prindërve nga ish-bashkëjetuesi, Nevila Mataj duket se fajëson veten për krimin që ndodhi dje në Tiranë.
Burime nga Policia thanë dje se krimi i rëndë që ndodhi në Unazën e Re, ku u ekzekutuan me armë zjarri Bujar e Xhevahire Mataj, kishte të bënte me mosmarrëveshjet e vazhdueshme të autorit me prindërit e bashkëjetueses së tij.
Këto dyshime, edhe pse jo të thëna drejtpërdrejt, vërtetohen nga ato që shkuan në “Facebook” vajza 37-vjeçare e viktimave. Madje, ajo shprehet se i ka vrarë vetë, duke lënë të kuptohet se për shkak të saj kanë ndodhur mosmarrëveshjet.
“Si ju vrava unë, gjëja ime më e shtrenjtë…”, ka shkruar Nevila, duke i kërkuar fillimisht falje të vëllait e më pas gjithë të tjerëve. Edhe pse pa pëlqimin e prindërve, ajo kishte pasur një bashkëjetesë të gjatë me autorin e krimit, 52-vjeçarin Majlind Lila, i cili në fund kreu edhe vetëvrasje.
Nga lidhja e tyre ka ardhur në jetë një vajzë 5 vjeçe, me të cilën tashmë Nevila jeton e vetme në Suedi. Burime nga Policia thanë dje se çifti kishte udhëtuar bashkë drejt Suedisë disa vite më parë, por prej dy vitesh duket se ata ishin ndarë. Majlindi kishte shkuar të jetonte në Greqi tek i vëllai, nga ku ishte larguar dy ditë para ngjarjes, duke mbërritur në Tiranë.
VAJZA E VIKTIMAVE
Duke i hedhur një sy profilit në rrjetin social “Facebook” të Nevila Matajt, vërejmë se kohët e fundit ajo ka shpërndarë disa shkrime të botuara në media të ndryshme për vrasjen e femrave.
Nga ana tjetër, herë pas here ajo ka të postuara fraza që të lënë të kuptosh se diçka në jetën e saj nuk ka shkuar mirë. Madje, edhe citime të Nënë Terezës, si për shembull: “Disa njerëz vijnë në jetën tënde si bekim, të tjerë vijnë si mësim…”
Por edhe si një shprehje që ajo e ka publikuar në “Facebook” më 12 janar, vetëm 3 ditë më parë, ku thuhet: “Qëndro me ata, të cilët ta dinë vlerën e të respektojnë. Të tjerëve rruga e mbarë u qoftë”.
Fotografitë dhe postimet e saj në rrjetin social komentohen shpesh nga profile që rezultojnë të jenë objekt i shoqatave kundër dhunës ndaj grave e fëmijëve. Nisur nga krimi i rëndë që ndodhi mëngjesin e djeshëm në Tiranë, ku u vranë prindërit e Nevilës, por edhe nga këto të dhëna që na ranë në sy në profilin e saj në “Facebook”, u interesuan strukturat e Policisë së Shtetit.
Megjithatë, nga verifikimet e kryera nga ana e Policisë, nuk rezultoi, që të paktën në Shqipëri, ajo të ketë bërë ndonjë ankesë për dhunë në familje apo për kanosje nga ana e bashkëjetuesit, Majlind Lila.
Se çfarë ka ndodhur në Suedi gjatë kohës që ata kanë qëndruar bashkë atje, këtë nuk mund ta themi me siguri. Por duket se nga gjithë këto të dhëna, arsyeja e ndarjes së tyre nuk mund të ketë qenë vetëm fakti që prindërit e ndjerë të Nevilës kanë qenë kundër bashkëjetesës së tyre.
