Ditën e djeshme SPAK ka marrë në pyetje gazetarin Elton Qyno teksa i ka kontrolluar atij banesën dhe zyrën e tij të punës.
Lidhur me ngjarjen ka patur reagime të shumta nga kolegë gazetar në mbështetje të Qynos ndërkohë që ditën e sotme Prokuroria e Posaçme ka reaguar për mes një deklarate zyrtare duke sqaruar arsyet e marrjes në pyetje.
Sipas SPAK, materialet e publikuara në media, nga gazetari Qyno, ndër të tjera kanë qenë të dhëna të padokumentuara, që lidheshin me dëshmitë e Nuredin Dumanit.
Njoftimi i SPAK:
Prokuroria e Posaçme po kryen hetime në kuadër të procedimit penal nr.75 viti 2022 në kuadër të të cilit janë duke u hetuar persona me rrezikshmëri të lartë shoqërore, për vepra penale të rënda dhe që kanë sjellë si pasojë vrasjen e disa personave, vepra penale të cilat janë kryer në formën e bashkëpunimit të posaçëm të grupit të strukturuar kriminal.
Në datën 10.12.2023 janë konstatuar të botuara në faqen e internetit të medias audiovizive Ora News (oranews.tv), artikuj të shkruara nga gazetari Elton Qyno, që bëjnë fjalë për disa komunikime të kryera nga persona që janë subjekte të hetimeve paraprake. Në datën 11.12.2023 artikujt janë publikuar edhe nga media të tjera.
Në artikujt që janë publikuar nga gazetari Elton Qyno, është konstatuar dukshëm se, teksti dhe përmbajtja e bisedave në këto publikime përmbante disa pjesë të komunikimeve që bashkëpunëtori i drejtësisë Nuredin Dumani ka bërë me disa persona të tjerë (të paidentifikuar deri aktualisht nga hetimet) në platformën e kriptuar SkyECC, që janë objekt i hetimeve paraprake.
