Hetuesit austriakë kanë bastisur zyrat e kancelarit austriak, Sebastian Kurz dhe partisë së tij nën dyshimet se është i përfshirë në afera korruptive.
Mediat austriake raportojnë se një grup hetuesish kanë sekuestruar pajisjet kompjuterike, si dhe telefonat e regjistruar në emër të partisë.
Dyshimet lidhen me një hetim të vjetër, që në 2016, kur Kurz ishte ministër i Jashtëm i Austrisë dhe më pas bëri një koalicion me populistin e ekstremit të djathtë, Heinz-Christian Strache. Ky i fundit u dënua për skandalin “IbizaGate”, ku u kap në përgjime teksa premtonte të ndryshonte ligjet për të favorizuar një spital privat në Austri.
Kurz mohon përfshirjen në këtë aferë, ndërkohë që tashmë po hetohet për financimin e paligjshëm të disa sondazheve të manipuluara, me synimin favorizimin e një partie të caktuar.
“Midis 2016 dhe 2018, “burimet nga ministria u përdorën për të financuar sondazhe të opinionit pjesërisht të manipuluara, që i shërbenin një interesi politik ekskluzivisht partiak”, shpjegoi prokuroria austriake.
Emri i partisë nuk bëhet me dije, por kompania që bëri sondazhin është e njëjta që zotëron tabloidin “Osterreich”.
