Mandati i anëtarit të AMF-së drejt përfundimit, Kuvendi shpall proçedurat e zëvendësimit: ja kriteret
Mandati i një prej anëtarëve të bordit të Autoritetit të Mbikqyrjes Financiare, Arjan Saliatit, është drejt përfundimit, çka do të thotë se Kuvendi ka nisur proçedurat për zëvendësimin e tij. Proçesi do të bazohet në Ligjin nr. 9672, datë 03.07.2006, “Për Autoritetin e Mbikëqyrjes Financiare”, për përzgjedhjen e Anëtarit të ri, ndërsa kriteret ligjore që duhet të plotësojnë kandidaturat për anëtar të AMF janë ato të parashikuara në nenin 5, te ligjit “Për Autoritetin e Mbikëqyrjes Financiare.
Kriteret për kandidatët
Kriteret për kandidaturat janë:
-Të jetë shtetas shqiptarë.
-Të ketë përfunduar ciklin e plotë të studimeve universitare në një nga këto fusha: ekonomi, juridik ose të lidhur me shkencën e aktuarëve
-Me përvojë profesionale të paktën 7- vjeçare, nga e cila, të paktën, 5 vjet në njërën nga këto fusha ose në disa prej tyre të marra së bashku: financë-kontabilitet; administrim i shoqërive tregtare; këshillim ligjor i shoqërive tregtare; hartim legjislacioni; shkencë e aktuarëve; sigurime shoqërore dhe pensione.
-Me integritet moral dhe profesional.
-Të paangazhuar në funksione drejtuese partiake.
-Të pashpallur si të dënuar penalisht, me vendim gjykate të formës së prerë.
-Në përmbushje të kërkesave dhe dispozitave ligjore për konfliktin e interesave.
Kandidatët që pengohen
Nuk mund të jenë anëtarë të Bordit të Autoritetit personat, të cilët: në tre vitet e fundit kanë qenë ortakë, aksionarë, apo anëtarë të organeve drejtuese të subjekteve të mbikëqyrura;
Kanë lidhje familjare me personat e parashikuara në këtë paragraf: në tre vitet e fundit kanë qenë punonjës me kohë të pjesshme apo të plotë në subjektet e mbikëqyrura.
